O nome da serie xa di moito, e é que Sex Education (Educación sexual en galego) é literalmente unha serie coa que aprender de educación sexual.
Esta produción feita por Netflix no Reino Unido está enganchando a millóns de telespectadores de todo o mundo e, o máis importante, facendo que moitas persoas se den conta e aprendan de sexualidade, roles de xénero, educación sexual, psicoloxía ou ITS.
Sex Education ten todos os alicientes que se agardan dunha serie para pasar un bo tempo entretidos. Ten intriga, ten comedia e actuacións moi boas, pero ademais as súas mensaxes gardan un transfundo que pode ser moi positivo para aprender como funcionan as relacións e os beneficios e perigos que implican.
O argumento da serie é o seguinte: Otis é un adolescente inadaptado fillo dunha terapeuta sexual que está acostumado a escoitar falar moito de sexo e sexualidade na casa. Tras ter que asesorar sobre sexo a un rapaz que tiña ansiedade, establece un negocio de asesoramento sexual coa súa amiga Maeve para axudar aos seus compañeiros de instituto a lidar cos seus problemas sexuais.
Xa na segunda temporada entra en xogo unha trama sobre acoso sexual e outra sobre un gromo de clamidia que fai repensar á escola a necesidade da protección ante as ITS. Na última temporada, a terceira, recentemente estreada, o debate céntrase en se hai que promover a abstinencia ou permitir aos rapaces e rapazas aprender sobre sexualidade para que así sintan máis seguridade á hora de afrontar as súas relacións.
Segundo a web suramericana ‘La Tercera’, “a serie británica, estreada en 2019, retrata a vida sexual dun grupo de adolescentes; sen moralina, sen tabús, sen prexuízos nin idealizacións, vai expoñendo as interrogantes e dificultades que experimentan as persoas novas fronte ao espertar da súa sexualidade e identidade de xénero. E engade: “Alí, falan de todo; desde saír do armario fronte aos teus pais, ter medo a expresar a súa identidade de xénero, sentirse acomplexado co seu corpo ou presionado por estándares sexuais inalcanzables, ata interromper un embarazo, contaxiarse dunha ITS ou sufrir abuso sexual”.
Incluso o portal Educación Tres punto Cero recomenda a serie coma un bo recurso para traballar na educación sexual: “A serie de Netflix aproveita as peripecias dos estudantes dun instituto para tratar temas relacionados coa sexualidade e igualdade: enfermidades, discriminación de xénero, prácticas sexuais…”.
En definitiva, a serie Sex Education non só é unha boa serie para pasar un tempo entretido, senón que tamén serve para aprender sobre sexualidade divertíndonos.
